లివర్ ఆరోగ్యం కోసం బ్లాక్ కాఫీ... ఎలా, ఎంత తాగితే మేలు?

చాలా మందికి రోజు బ్లాక్ కాఫీతోనే మొదలవుతుంది. బరువు తగ్గించుకోవడానికో, చురుకుగా ఉండటానికో కారణం ఏదైనా కావచ్చు, బ్లాక్ కాఫీ మన దినచర్యలో భాగమైపోయింది. అయితే, ఈ సాధారణ పానీయం మన అంతర్గత అవయవాలను, ముఖ్యంగా కాలేయాన్ని తీవ్రమైన సమస్యల నుంచి కాపాడగలదా? ముఖ్యంగా, ఫ్యాటీ లివర్ వ్యాధి ముప్పును బ్లాక్ కాఫీ తగ్గించగలదా? అనే సందేహాలు చాలా మందిలో ఉన్నాయి. ఈ అంశంపై ముంబైలోని సైఫీ హాస్పిటల్‌కు చెందిన హెపటాలజిస్ట్, లివర్ ట్రాన్స్‌ప్లాంట్ ఫిజీషియన్ డాక్టర్ చేతన్ కేశవ్‌లాల్ స్పష్టత ఇచ్చారు.

బ్లాక్ కాఫీని రోజూ తాగడం వల్ల ఫ్యాటీ లివర్ వ్యాధి వచ్చే ప్రమాదాన్ని తగ్గించుకోవచ్చని, ఇప్పటికే ఈ సమస్య ఉన్నవారిలో వ్యాధి తీవ్రత పెరగకుండా నిరోధించవచ్చని ఆయన తెలిపారు. కాఫీ వినియోగం వల్ల కాలేయానికి మచ్చలు (ఫైబ్రోసిస్) ఏర్పడే ప్రమాదం కూడా తగ్గుతుందని, దీర్ఘకాలిక కాలేయ వ్యాధుల పెరుగుదల నెమ్మదిస్తుందని డాక్టర్ చేతన్ వివరించారు.

కాఫీ ఎలా మేలు చేస్తుంది?
కాఫీలో సహజసిద్ధంగా ఉండే యాంటీ ఆక్సిడెంట్లు కాలేయ ఆరోగ్యాన్ని కాపాడటంలో కీలక పాత్ర పోషిస్తాయి. "కాఫీలో ఉండే కెఫిన్, క్లోరోజెనిక్ యాసిడ్ వంటి యాంటీ ఆక్సిడెంట్లకు యాంటీ-ఇన్‌ఫ్లమేటరీ (వాపును తగ్గించే) గుణాలు ఉంటాయి. ఇవి కాలేయ కణాలను దెబ్బతినకుండా కాపాడటంతో పాటు, శరీర జీవక్రియలను మెరుగుపరుస్తాయి" అని డాక్టర్ చేతన్ పేర్కొన్నారు. శరీరంలోని అన్ని జీవక్రియలలో కాలేయం కీలకపాత్ర పోషిస్తుంది కాబట్టి, కాఫీలోని ఈ గుణాలు కాలేయానికి ఎంతో మేలు చేస్తాయి.

కాఫీ ఒక్కటే పరిష్కారమా?
కాఫీ కాలేయానికి మంచిదని చెబుతున్నంత మాత్రాన, కేవలం దానిపైనే ఆధారపడటం సరైన విధానం కాదని నిపుణులు గట్టిగా హెచ్చరిస్తున్నారు. దీనికి కారణం తెలియాలంటే ఫ్యాటీ లివర్ వ్యాధి రావడానికి గల మూలాలను పరిశీలించాలి. ముఖ్యంగా నాన్-ఆల్కహాలిక్ ఫ్యాటీ లివర్ వ్యాధికి కదలిక లేని జీవనశైలి, అనారోగ్యకరమైన ఆహారపు అలవాట్లు, ఊబకాయం, మధుమేహం ప్రధాన కారణాలు. వీటి వల్ల కాలేయంలో అధికంగా కొవ్వు పేరుకుపోయి, అది వాపు, మచ్చలకు దారితీస్తుంది. తీవ్రమైన సందర్భాల్లో ఇది కాలేయ వైఫల్యానికి కూడా కారణం కావచ్చు.

కాబట్టి, కేవలం కాఫీ తాగి ఫ్యాటీ లివర్‌ను నయం చేసుకోవచ్చని ఆశించడం సరికాదు. బ్లాక్ కాఫీ కాలేయ ఆరోగ్యానికి తోడ్పడినప్పటికీ, అది సమతుల్య ఆహారం, క్రమం తప్పని వ్యాయామం, బరువు నియంత్రణ, ఆల్కహాల్‌కు దూరంగా ఉండటం, సకాలంలో వైద్య పరీక్షలు చేయించుకోవడం వంటి ప్రాథమిక అంశాలకు ప్రత్యామ్నాయం కాదని డాక్టర్ చేతన్ గుర్తుచేశారు. కాఫీ అనేది చికిత్సలో ఒక సహాయకారి మాత్రమే.

ఎలాంటి కాఫీ, ఎంత మోతాదులో తాగాలి?
పాలు, పంచదార కలపని బ్లాక్ కాఫీ తాగడమే ఉత్తమమని డాక్టర్ చేతన్ సూచించారు. "కాఫీలో అదనంగా సిరప్‌లు, విప్డ్ క్రీమ్, స్వీటెనర్లు వంటివి కలపడం వల్ల బరువు పెరిగి, జీవక్రియ సమస్యలు తలెత్తుతాయి. ఇవి ఫ్యాటీ లివర్ సమస్యను మరింత తీవ్రతరం చేస్తాయి" అని ఆయన హెచ్చరించారు. ఆరోగ్యంగా ఉన్న పెద్దలు రోజుకు 2-3 కప్పుల బ్లాక్ కాఫీని నిరభ్యంతరంగా తాగవచ్చని ఆయన తెలిపారు.

అయితే, కెఫిన్ పడని వారు, గర్భిణులు, గుండె లేదా ఊపిరితిత్తుల వ్యాధులు, ఆందోళన, నిద్రలేమి సమస్యలు ఉన్నవారు, కొన్ని రకాల మందులు వాడుతున్నవారు కాఫీని అధికంగా తీసుకునే ముందు వైద్యులను సంప్రదించడం తప్పనిసరి. కెఫిన్ తగ్గించాలనుకునే వారికి డికాఫిన్ కాఫీ మంచి ప్రత్యామ్నాయం.